ಇಲ್ಲಿ ನಮ್ಮ ಶಾಲಾರಂಗದ ಕಲಾವಿದರು ಮಕ್ಕಳ ಮುಂದೆ ಹಾಗೂ ಮಕ್ಕಳ ಜತೆ ಹಾಡುಹೇಳುತ್ತಾರೆ, ಕತೆ ಹೇಳುತ್ತಾರೆ, ಚಿತ್ರ ಬಿಡಿಸುತ್ತಾರೆ, ಆಟವಾಡುತ್ತಾರೆ, ಬೊಂಬೆಗಳ ಮೂಲಕ ಕತೆ ತೋರಿಸುತ್ತಾರೆ. ತಾವೇ ಕತೆಗಳನ್ನು ಅಭಿನಯಿಸುತ್ತಾರೆ. ಇವೆಲ್ಲದರ ಮೂಲಕ ವರ್ತಮಾನದ ಅನೇಕ ಸಂಗತಿಗಳನ್ನು ಮಕ್ಕಳಿಗೆ ಮುಟ್ಟಿಸುತ್ತಾರೆ. ಆದರೆ ಅವು ಕೇವಲ ಮಾಹಿತಿಗಳಾಗದೇ ಅನುಭವವಾಗುವಂತೆ ನೋಡಿಕೊಳ್ಳುತ್ತಾರೆ. ಪಠ್ಯ ಸಂವಹನೆಯಲ್ಲಿ ಅಗತ್ಯವಾದ ಹಾವ-ಭಾವ, ಕಲ್ಪನೆ  ಮುಂತಾದವುಗಳ ಪರಿಣಾಮಕಾರಿ ಬಳಕೆಯ ಸಾಧ್ಯತೆಯನ್ನು ಶೋಧಿಸುವುದು ಹೇಗೆ ಎಂಬುದರ ಹಾದಿ ಕಾಣಿಸುತ್ತಾರೆ.

ನಿರ್ದಿಗಂತದ ಮಹತ್ವದ ಯೋಜನೆಯಿದು. ರಂಗಭೂಮಿ ಮತ್ತು ಮಕ್ಕಳ ರಂಗಭೂಮಿಯಲ್ಲಿ ಆಸಕ್ತಿಯಿಂದ ತೊಡಗಿಸಿಕೊಂಡಿರುವ ೧೦ ಕಲಾವಿದರು ಒಂದು ವರ್ಷಗಳ ಕಾಲ ಈ ಯೋಜನೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಶಿಕ್ಷಣ ಮತ್ತು ರಂಗಭೂಮಿಯ ಸಂಬಂಧದ ಪರಿಣಾಮಕಾರಿ ಅಧ್ಯಯನನಡೆಸಲು ಈ ಕಲಾವಿದರು ರಾಜ್ಯದ ೨೦೦ ಶಾಲೆಗಳಲ್ಲಿ ಶಾಲಾರಂಗ ಪ್ರಯೋಗ ಮಾಡುತ್ತಿದ್ದಾರೆ.